Ինչպես օգտագործել աման լվացող մեքենան. ամեն ինչ՝ բեռնումից մինչև խնամք

Որքանով գոհ կլինեք ձեր աման լվացող մեքենայում սպասք լվանալու որակից, կախված է ոչ միայն սարքի ապրանքանիշից և, հետևաբար, դրա հնարավորություններից, այլև այն բանից, թե որքան պատասխանատու եք դուք ինքներդ մոտենում այս գործընթացին:

Ի՞նչ է ձեզ հարկավոր աման լվացող մեքենայի համար: Լվացող միջոցից բացի, ի՞նչ հատուկ միջոցներ են պետք նրան: Ինչպե՞ս ճիշտ տեղադրել սպասքը խցիկում: Ինչպիսի՞ խնամքի կարիք ունի ձեր օգնականը: Եթե դուք ակնկալում եք կատարյալ արդյունք, եթե ցանկանում եք, որ ձեր սպասքը միշտ փայլի մաքրությամբ, լսեք մեր խորհուրդները։

Ինչպես տեղադրել սպասքը աման լվացող մեքենայի մեջ

Լվացքի արդյունավետությունը մեծապես կախված է նրանից, թե որքան ճիշտ եք տեղադրում ձեր բոլոր ափսեները, բաժակները, պատառաքաղները, թավաներն ու ամանները աման լվացող մեքենայի մեջ: Եթե դուք անտեսում եք աման լվացող մեքենայի մեջ սպասքը տեղադրելու մի շարք նրբություններ, արդյունքը կարող է ձեզ դուր չգալ: Ընդ որում, դրա համար դուք կմեղադրեք ձեր «օգնականին» և շատ իզուր...

Բոլոր ժամանակակից աման լվացող մեքենաները, բացառությամբ գերկոմպակտ մոդելների, հագեցած են սպասքի երկու զամբյուղով, ինչպես նաև պատառաքաղի սկուտեղով: Վերին զամբյուղը նախատեսված է ափսեների, բաժակների, գավաթների  և այլ համեմատաբար փոքր իրերի համար։ Եթե ձեր աման լվացող մեքենան ունի վերին զամբյուղի բարձրությունը կարգավորելու հնարավորություն, ընտրեք դրա օպտիմալ դիրքը. ջուրը պետք է հավասարապես թրջի բոլոր բեռնված սպասքը:

Սպասք լվացող մեքենայի ստորին զամբյուղը նախատեսված է կաթսաների, թավաների, թխման թավաների, մեծ ափսեների, սպասքի և այլ խոշոր իրերի համար: Շատ մոդելներում ստորին զամբյուղները ունեն  ծալովի բռնիչներ: Բարձրացված դիրքում դրանք  օգնում են համաչափ բաշխել սպասքը:  Բայց եթե շատ սպասք կա, կամ պարագաները շատ մեծ են, բռնիչները պարզապես կարելի է ծալել. դուք կստանաք ուղիղ հարթակ մեծ իրերի համար:

Պարագաների սկուտեղն իրականում փոքր շարժական զամբյուղ է, որի մեջ դրվում են գդալները, պատառաքաղները, սեղանի դանակները։ 

Պրեմիում դասի մեքենաներում հաճախ հանդիպում է նաև ալյումինե սկուտեղ՝ նախատեսված արծաթե պարագաների համար: 

Ինչպես ճիշտ տեղադրել սպասքը մեքենայի մեջ

ԽՈՐՀՈՒՐԴ 1

Նախքան ամանները մեքենայի մեջ դնելը, համոզվեք, որ այնտեղից հանել եք սննդի մեծ կտորները, ոսկորները, անձեռոցիկները և այլն։ 

ԽՈՐՀՈՒՐԴ 2

Մինչև մեքենայով լվանալը ցողեք սպասքը տաք ջրի տակ, որպեսզի նվազեցնեք էլեկտրաէներգիայի ծախսն ու ավելի լավ վերջնական արդյունք գրանցեք: 

ԽՈՐՀՈՒՐԴ 3

Նախ մեքենայի մեջ դասավորեք խոշոր սպասքը, հետո՝ մանրերը: 

ԽՈՐՀՈՒՐԴ 4

Ափսեները դասավորեք այնպես, որ ներսի կողմը լինի դեպի կենտրոն: Աշխատեք, որ ափսեների արանքում ազատ տեղ մնա, այլապես՝ դրանք կարող են լավ չլվացվել:

ԽՈՐՀՈՒՐԴ 5

Բաժակները պետք է դասավորել դեպի ներքև, որ դրանց մեջ ջուր չկուտակվի: Նուրբ բաժակները տեղադրեք իրարից հեռու: 

ԽՈՐՀՈՒՐԴ 6

Կաթսաներն ու թավաները ցանկալի է լվանալ առանձին: Ջեռոցի թավաները մեքենայում տեղադրեք թեքությամբ, իսկ կաթսաները դեպի ներքև ուղղությամբ: 

ԽՈՐՀՈՒՐԴ 7

Մի ծանրաբեռնեք մեքենան: Ջուրը պտտվելու տեղ պետք է ունենա: 

Եթե արդեն պարզ է, թե ինչպես տեղավորել սպասքը մեքենայում, ևս մեկ անգամ նայեք մեքենայի մեջ, թե արդյոք այնտեղ տեղավորած ամեն ինչ կարելի է լվանալ սարքով: 

Ինչ չի կարելի լվանալ աման լվացող մեքենայում

Աման լվացող մեքենայի մեջ կարելի է լվանալ գրեթե ամեն ինչ՝ նուրբ բաժակներից, մինչև թավաներ ու ջեռոցի տապակներ: Բայց ցանկացած կանոն ունի նաև բացառություններ: Որոշ ապրանքներ դուք կարող եք լվանալ սարքում միայն մեկ՝ առաջին և վերջին անգամ: Ոչ բոլոր նյութերն են ունակ երկար ժամանակ մնալ ջրում, բարձր ջերմաստիճանում, արգեսիվ քիմիական նյութերի ազդեցությամբ, չորացման տաք օդի ներքո: 

Եկեք պարզենք, թե որ սպասքը չի կարելի լվանալ աման լվացող մեքենայի մեջ, հատկապես, եթե վերջինս ունի լվանալու  ռեժիմների սահմանափակ ընտրություն:

Փայտ

Եթե չեք պատրաստվում առաջիկայում հրաժարվել ձեր սիրելի գրտնակից կամ փայտե գդալից, դրանք մի լվացեք մեքենայում: Ջրում դրանք կներծծեն խոնավությունն ու կուռչեն՝ կորցնելով իրենց ֆունկցիոնալությունն ու արտաքին տեսքը: 

Պլաստիկ

Պլաստիկը մեքենայի մեջ լվանալ կարելի է, բայց մի պայմանով, որ այն լինի ջերմակայուն: 

Բայց անգամ ջերմակայուն պլաստիկե սպասքը խորհուրդ չի տրվում տեղադրել ներքևի մասում, որտեղ ջերմությունը ավելի շատ է: Մեքենայում երբեք չտեղադրեք միանգամյա օգտագործման սպասք: 

Ճենապակի

Ավտոմատ լվացման պետք չէ ենթարկել նաև ճենապակյա, հատկապես՝ նուրբ ճենապակուց իրերը: 

Տաք ջրի հոսքից ջենապակին կարող է պատվել մանր ճաքերով: Ներկը ևս կարող է վնասվել, եթե պաշտպանիչ լաքով պատված  չէ: Եթե այնուամենայնիվ որոշել եք մեքենայով լվանալ այդ սպասքը, դա արեք «Նուրբ լվացում» ռեժիմով:  

Բյուրեղապակի

Բյուրեղապակին ևս «տաք լոգանք» չի սիրում: Այն վնասվում է ոչ այնքան տաք ջրից, որքան՝ դրա տատանումներից: Այն ևս պետք է լվանալ «Նուրբ լվացում» ռեժիմով: Հատկապես թանկարժեք նմուշները ավելի լավ է լվանալ ձեռքով: 

Ազնիվ և հիմնական մետաղներ

Որոշ մետաղների հակացուցված է ավտոլվացումը: Օրինակ արծաթյա գդալ-պատառաքաղները պետք  չէ լվանալ մեքենայի մեջ, այլապես դրանք արագ կսևանան: 

Լվացող միջոցների ազդեցության տակ արծաթից, արույրից, բրոնզից պատրաստված արտադրանքի մակերեսը խամրում է, և դրանք օրիգինալ փայլին բերելը շատ դժվար կլինի: 

Տաք ջուր և մաքրող միջոցներ չի հանդուրժում նաև պղինձը. դրանք ևս մգանում են և կորցնում տեսքը: 

Ալյումինը քիմիապես շատ ակտիվ մետաղ է, չնայած սովորական կյանքում մենք դա չենք նկատում դրա մակերեսի պաշտպանիչ օքսիդի թաղանթի պատճառով: Այնուամենայնիվ, նույնիսկ այս թաղանթը երբեմն չի կարողանում պաշտպանել տաք ջրում լվացող միջոցի  ազդեցությունից. աման լվացող մեքենայի մեջ գտնվելուց հետո ալյումինե արտադրանքները հաճախ ձեռք են բերում մուգ մոխրագույն ծածկույթ:

Սպասք լվացող մեքենայի մեջ երկրորդ կամ երրորդ լվացումից հետո թուջե սպասքը ևս  կծածկվի քայքայիչ շերտով և կկորցնի իր տեսքը:

Այլ

Սպասք լվացող մեքենայի մեջ պետք չէ լվանալ սուր խոհանոցային դանակները: Պրոֆեսիոնալները մաքրում են իրենց դանակները սառը հոսող ջրի տակ, քանի որ հակառակ դեպքում դրանք արագ կորակազրկվեն:

Մեքենայում մի դրեք նաև անփայլ կավե ամանեղեն և արվեստի իրեր. կավե միկրոմասնիկները արագ կխցանեն ֆիլտրերը:

Աման լվացող սարքի լավ աշխատանքի համար անհրաժեշտ է  օգտագործել մաքրող միջոց, վերականգնող աղ, ողողող միջոց:

Վերականգնող աղ

Վերականգնող աղը մասնակցում է ջրի փափկեցման ցիկլին։ Կտրականապես խորհուրդ չի տրվում լվանալ սպասքը կոշտ ջրով: 

Իոնափոխանակման խեժն օգնում է նվազեցնել ջրի կարծրությունը, որն առաջանում է դրանում մագնեզիումի և կալցիումի իոնների առկայությունից և դրանով իսկ կանխում է կեղևի առաջացումը աման լվացող մեքենայում: Այս խեժը լցված է հատուկ զտիչով, որով անցնում է ջրամատակարարումից մեքենա մտնող ջուրը։

Աղը պետք է լցնել լվացման գործընթացից առաջ իր համար նախատեսված հատուկ տարայում: 

Վերականգնվող աղի սպառումը կազմում է մոտ 1,5 կգ 20 լվացման համար և կախված է ձեր տարածքում ջրի կոշտության  աստիճանից:

Լվացող միջոց

Շուկայում լվացող միջոցների բազմազանության պայմաններում դժվար է ընտրություն կատարելը: Չէ որ բացի տարբեր ապրանքանիշներից, դրանք նաև ներկայացված են տարբեր տեսքով՝ փոշի, հաբ, գել: 

Կարևոր է հիշել, որ մեքենայի համար պետք է օգտագործել հենց աման լվացող միջոց, ոչ թե լվացքի փոշի, ձեռքի օճառ և այլ նման մաքրող միջոցներ: Դրանք ոչ միայն նորմալ չեն լվանա սպասքը, այլև՝ կվնասեն սարքը: 

 Ամենատարածված մաքրող միջոցները փոշին և հաբերն են:

Իհարկե, հաբերը շատ հարմար են օգտագործման տեսակետից: Բայց հիշեք, որ դրանք նախ փոշուց թանկ արժեն, բացի այդ կարճ լվացման ժամանակ չեն հասցնում ամբողջությամբ օգտագործվել: 

 Ողողոման նյութ

Եվ իհարկե կարևոր է ողողման նյութի օգտագործումը, քանի որ այն կանխում է ջրի կաթիլների հետքը սպասքի վրա, հատկապես՝ ապակիների: 

 Գործողության ռեժիմի ճիշտ ընտրություն

Երբ սպասքը ճիշտ դասավորված է, մաքրող միջոցները ընտրված, մնում է անցնել մաքրման ռեժիմին: 

Սպասք լվացող մեքենան, կախված մոդելից, կարող է ունենալ մինչև մեկ տասը (և երբեմն ավելի) տարբեր ռեժիմներ: Ներկայացնենք ամենատարածվածները: 

Թրջում

Այս ռեժիմը նախատեսված է վառված ուտելիքի հետքով թավաների համար, ինչպես նաև՝ այնպիսի սպասքի, որը երկար ժամանակ մնացել է առանց լվանալու: Մեքենան կթրջի այդ սպասքը, ապա կմաքրի դրանցից չորացած ուտելիքը: Բայց հիշեք, որ ցանկալի է, որ դուք նախապես հեռացնեք  սնունդը սպասքի մեջից: 

Ինտենսիվ լվացում

Շատ ժամանակակից սարքեր ունեն այս ռեժիմը: Այն նախատեսված է շատ կեղտոտ սպասքը լվանալու համար: Այս լվացման համար ջուրը տաքանում է մինչև 65 -70°С, որոշ մոդելների դեպքում՝  80°С: Ընդ որում, այդ ընթացքում մեքենան շատ ջուր ու էլեկտրաէներգիա է օգտագործում, այնպես որ՝ խորհուրդ է տրվում այս ռեժիմը ընտրել այն դեպքում, երբ վստահ եք, որ այլ ռեժիմները չեն հաջողի: 

Ստանդարտ ռեժիմ

Ստանդարտ ռեժիմը  հարմար է միջին աստիճանի աղտոտվածության սպասքը, ներառյալ`թարմ օգտագործված կաթսաները լվանալու համար: Ստանդարտ ծրագիրն իրականացվում է 60-65°C ջերմաստիճանում, իսկ ցիկլի տևողությունը չի գերազանցում 1-1,5 ժամը։

Տնտեսող լվացում

Այս ռեժիմ դուր կգա հատկապես տնտեսող մարդկանց, քանի որ այս ռեժիմում սպասքը լվացվում է 50-55°С աստիճանում, ինչն էլ թույլ է տալիս քիչ էլեկտրաէներգիա ծախսել: 

Արագ լվացում

Նրանք, ովքեր միշտ շտապում են, կընտրեն այս ռեժիմը, որը նախատեսված է ավելի քիչ կեղտոտ սպասքի համար: Գործընթացը, ինչպես տնտեսող ռեժիմում, իրականացվում է 55°C ջերմաստիճանում, սակայն դրա տևողությունը շատ ավելի կարճ է։

Նուրբ լվացում

Արդեն ասել ենք, որ նուրբ սպասքը պետք է լվանալ այս ռեժիմում: Այս ռեժիմում խցիկի ներսում ջերմաստիճանը չի բարձրանում 40-45°C-ից: Իհարկե այս կիսատաք ջրում հնարավոր չէ լվանալ շատ կեղտոտ ամաններ, բայց ապրանքը խնայելու համար ստիպված եք այն ընտրել: 

Սպասք լվացող մեքենայի խնամք

Լվացված սպասքը մեքենայից հեռացնելուց հետո պետք է հանել  ցանցի ֆիլտրը, որը գտնվում է խցիկի ներքևի ջրահեռացման անցքի վերևում, թափել  դրանից սննդի կուտակված մասնիկները և ողողել ցանցը  ջրի հզոր  շիթով:

Այնուհետև չոր կտորով սրբեք սարքի ներսը: Ապա որոշ ժամանակով բաց թողեք սարքի դուռը, որպեսզի այն չորանա և տհաճ հոտ չկուտակվի ներսում: